પીસી કે સ્માર્ટફોનમાં તમારા ફેવરિટ બ્રાઉઝરમાં તમે અમુક સાઇટ્સની અવારનવાર મુલાકાત લેતા હશો. લોકોની આ આદત ધ્યાનમાં રાખીને બ્રાઉઝર્સ આપણને સ્પીડ ડાયલની સગવડ આપે છે.
તમે જાણતા હશો તેમ ફોનની કોન્ટેક્ટસ એપમાં પણ સ્પીડ ડાયલની સગવડ હોય છે.
બ્રાઉઝરની સ્પીડ ડાયલ સગવડ પણ આવી જ છે. પીસી કે સ્માર્ટફોનમાં નવી ટેબ ઓપન કરતાં તેમાં આપણે જેનો સૌથી વધુ ઉપયોગ કરતા હોઈએ તેવી વેબસાઇટ્સના આઇકન જોવા મળે છે. ફાયરફોક્સમાં ઘણા સમયથી આવી સગવડ છે અને ગૂગલે ક્રોમના લેટેસ્ટ વર્ઝનમાં આ સગવડનો દેખાવ થોડો બદલ્યો છે.
પીસીમાં આપણે આ શોર્ટકટ્સને એડિટ કરી શકીએ છીએ એટલે કે તમે કોઈ ચોક્કસ વેબસાઇટનો શોર્ટકટ અહીં ઉમેરવા માગતા હો તો તે કરી શકો છો. ઉપરાંત બ્રાઉઝર પહેલેથી જે શોર્ટકટ બતાવતું હોય તેને એડિટ કરીને તેની જગ્યાએ નવી કોઈ વેબસાઇટનો શોર્ટકટ ઉમેરી શકો છો. સ્માર્ટફોનમાં ક્રોમ બ્રાઉઝરમાં નવી ટેબ પર સ્પીડ ડાયલમાંના શોર્ટકટ્સને બદલી શકાતા નથી ફક્ત દૂર કરી શકાય છે.