જાન્યુઆરી ૨૦૧૭ના આંકડા મુજબ ભારતમાં ૧.૨ અબજ મોબાઇલ છે અને આ આંકડા હવે એક વર્ષ જૂના છે! ભારતમાં ૧૦૦થી વધુ બ્રાન્ડના દર વર્ષે ૨૫ કરોડ મોબાઇલ નવા ઉમેરાય છે અને જૂના મોબાઇલ નકામા થતા હાય છે. આમાં હજી કમ્પ્યુટર્સ, ટેબ્લેટ્સ, પ્રિન્ટર્સ વગેરેનો ઉમેરો કરીએ તો ભારતમાં જૂની ઇલેકટ્રોનિક વસ્તુઓનો પ્રશ્ન વધુ ને વધુ ગંભીર બનતો જાય છે.
યુએનના આંકડા મુજબ ભારતે ૨૦૧૬ના એક વર્ષમાં ૨૦ લાખ ટન ઇ-વેસ્ટ પેદા કર્યો હતો. ૨૦૧૮ના અંત સુધીમાં આ આંક વધીને ૩૦ લાખ ટન સુધી પહોંચી જાય તેમ છે. ભારતના શહેરોમાં ઇ-વેસ્ટનો યોગ્ય રીતે નિકાલ કરવા માટે પ્રમાણમાં ઠીક ઠીક પગલાં લેવાયા છે પરંતુ ગ્રામ્ય વિસ્તારોમાં સ્થિતિ દિવસે દિવસે ગંભીર બનતી જાય છે.
આખું વિશ્વ દર વર્ષે ૪.૪૭ કરોડ ટન ઇ-વેસ્ટ પેદા કરે છે. સમગ્ર વિશ્વમાં એશિયામાં સૌથી વધુ, ૧.૮૨ કરોડ ટન ઇ-વેસ્ટ પેદા થાય છે.
આફ્રિકા સૌથી ઓછો ઇ-વેસ્ટ પેદા કરે છે. જ્યારે માથાદીઠ ઇ-વેસ્ટની દૃષ્ટિએ સમગ્ર વિશ્વમાં યુરોપ સૌથી આગળ છે.